金融海嘯中...我們如何自處

各位︰

連日以來，相信不少客戶都收到我的電話，或者至少收到我send來一封又一封email。

可能信件很長、電話很煩擾，不過，我希望大家真係會關心這次金融危機，細心一看我所寄來的每一封email。

我自己是AIA的保險客戶，但係出事至今，除左一個sms，一個由AIA所印製的pdf版聲明...我收唔到其他任何回應。

問客人，大家都話︰「我經紀無搵過我...聽講政府注資，咁應該無事架啦，唔係咩？」
客人又問我︰「點解你地Convoy顧問會黎講解AIA情況？我並無在康宏開呢D戶口，你地都咁關心？」


我想提一提返，Convoy係一間中介人公司，聯繫住環球巿場的各大金融機構，AIA/AIG係其中之一。
所以，我地總能夠第一時間得到相關消息。
我地亦有齊哂AIA/AIG產品的各項表格，保險、基金、強積金戶口的資料及表格，我地都有，
如果大家有需要，但又搵唔到自己的保險經紀，我地都可以幫您手填表、交表。

同時，我係以獨立顧問的身份，關心大家的理財狀況。
雖然D單唔係我開，但既然當日俾左承諾大家，我地會協助您處理所有理財需要，
如果今日我唔兌現承諾，我唔知風暴過後，我仲可以點樣誇口爭取您的信任。


所以大家真係唔駛怕煩到我。呢個係我工作，係我責任，
對您黎講，呢個唔係bonus service，而係本來就應得的服務。

當然，我未必樣樣做到最好，但大家有咩意見、有咩要求，只要肯提出，我都會盡力去做。

-------------------------------------------------------------------------------------

我想再次強調，究竟大家的資產保障程度有幾高︰

1. 康宏係中介公司，合作機構、產品數以百計，部份金融機構出事，並不影響我地的業務及運作。

2. 如果康宏不幸倒閉，您的戶口依然獨立運作，我亦可以轉到其他顧問公司，繼續以獨立顧問身份，幫您睇住個戶口。

3. 如果您選用的公司真係一夜倒閉，由於強積金、信託基金都係由獨立的信託人管理，您的錢，唔會消失、唔會有人動用到。
例如AIA/AIG就算倒閉，您的錢仍係您的錢，並非AIA/AIG資產，佢地無權用、無權掂，只能夠俾返您。

4. 如果您揀左一間有額外資產保障的戶口，仲會根據各公司個別條例而得到保障。

-------------------------------------------------------------------------------------

如果您/您家人係AIA客戶，希望您可以睇埋以下呢一段︰

官方聲明已經指出，
AIG與AIA資產獨立運作，旗下的強積金、基金都係獨立信託人管理財產。
您的錢，始於都係咁安全。香港的保監、證監亦有充份的法例、規定保障客戶利益。

美國政府$850億美金已經注資入AIG，短期財政問題已解決。

但係大家必須留意以下的風險︰

1. US$850億只係由政府借俾AIG的貸款，借貸期2年。

2. 呢2年期間，AIG必須變賣手上的資產，套取現金，連本帶利，要將D錢還返俾政府。

3. 美國政府已確定撤換AIG高層，新人上場，會否對AIG/AIA帶黎重大改變，呢個係未知之數。

呢度只作簡要交待，如果有咩唔清楚的地方，
建議您向我或者您自己的理財顧問再查詢詳情。

-------------------------------------------------------------------------------------

最後，多謝大家咁有心機睇呢封電郵。

請大家注意，呢封信不會就任何個別理財產品提供資訊及建議，並無任何銷售成份。
呢一度，只係分享我的個人感想，同埋交待返公司運作架構、補充經濟新聞消息。

希望我講的話，會對大家有用。